میں نے اپنی وزارت کی سو روزہ کارکردگی کو خان صاحب کے سامنے رکھا ہے، زرتاج گل

تسنیم خبررساں ادارے کی رپورٹ کے مطابق، پاکستانی وزیر مملکت برائے موسمیاتی تبدیلی زرتاج گل نے کہا کہ حکومت کا سو روزہ پلان مکمل ہونے کے بعد وزیراعظم وزراء کی کارکردگی کا جائزہ لے رہے ہیں، وزیراعظم نے کچھ وزراء کی کارکردگی کو سراہا ہے اور ان کی کارکردگی سے مطمئن ہوئے جبکہ بعض وزراء کو کارکردگی بہتر بنانے کی ہدایت کی ہے۔

زرتاج گل نے کہا کہ ماضی کی حکومتوں میں وزراء کی کارکردگی کا جائزہ نہیں لیا جاتا تھا لیکن تحریک انصاف کی حکومت نے وزراء کو عوام کے سامنے جوابدہ کیا ہے اور وزراء اپنی کارکردگی پہلی مرتبہ وزیراعظم کے سامنے پیش کر رہے ہیں جو مثبت قدم ہے۔

انہوں نے کہا کہ میں نے اپنی وزارت کی سو روزہ کارکردگی کو بھی وزیراعظم کے سامنے رکھا ہے، وزیراعظم نے میری وزارت کی کارکردگی کو خوش آئند قرار دیا ہے۔

ایک سوال کے جواب میں انہوں نے کہا کہ منی لانڈرنگ اور کرپشن کرنے والوں کو عوام سامنے بے نقاب کیا جا رہا ہے، کوئی کسی خوش فہمی میں نہ رہے، سب کا بلاتفریق احتساب ہو رہا ہے۔