جوہری توانائی کے عالمی ادارے نے ایک بار پھر ایران مخالف امریکی دعوے کو مسترد کردیا

تسنیم خبر رساں ادارے کی رپورٹ کے مطابق جوہری توانائی کے عالمی ادارے کے سربراہ یوکیا آمانو نے ایران کی جانب سے جامع ایٹمی معاہدے کی پابندی کرنے کی ایک بار پھر تصدیق کرتے ہوئے امریکی دعوے کو مسترد کردیا ہے۔

یوکیا آمانو کا کہنا ہے کہ ایران جامع ایٹمی معاہدے کی پابندی کر رہا ہے جس پر تہران اور پانچ جمع ایک گروپ کے رکن ملکوں نے سن دو ہزار پندرہ میں دستخط کیے تھے۔

یوکیا کا کہنا ہے کہ ایران ایٹمی معاہدے کے تمام شرائط پر پورا پورا عمل کررہا ہے۔

واضح رہے کہ امریکہ کی جانب سے اس دعوے کے بعد کہ ایران جامع ایٹمی معاہدے کی پابندی نہیں کر رہا، جوہری توانائی کے عالمی ادارے آئی اے ای اے نے دوسری بار اس بات کی تصدیق کی ہے کہ ایران جامع ایٹمی معاہدے کا پابند ہے۔

امریکی حکومت بھی ہر نوے دن کے بعد پیش کی جانے والے دو رپورٹوں میں اس بات کی تصدیق کرنے پر مجبور ہوگئی ہے کہ ایران جامع ایٹمی معاہدے کا پابند ہے اور وہ ایران کی جانب سے ایٹمی معاہدے کی خلاف ورزی کا ایک بھی معاملہ شواہد کے ساتھ پیش کرنے میں ناکام رہی ہے۔

اس سے قبل آئی اے ای اے نے اکتیس اگست کو پیش کی جانے والی آٹھویں رپورٹ میں بھی اس بات کی تصدیق کی تھی کہ ایران جامع ایٹمی معاہدے کے تحت اپنے تمام وعدوں پر پوری طرح سے کاربند ہے۔

اس کے برخلاف حکومت اور ٹرمپ انتظامیہ جامع ایٹمی معاہدے پر عملدرآمد کی راہ میں مسلسل روڑے اٹکاتی چلی آرہی ہے۔